【父親節仲可以出去同人迫，係一種福氣】
首先唔好誤會，圖片中呢位並唔係我老竇，係冷氣師傅。
佢舖頭喺我屋企附近，細細個我媽咪搵佢上嚟整過幾次冷氣，我其實幾憎佢，因為條友好勞嘈，又冇禮貌，非常冇耐性，每次經過佢舖頭都係鬧緊人，黑口黑面，喺街坊眼中，佢口碑確實麻麻，唔係技術問題，係態度問題。
十幾廿年後嘅今日，我屋企壞咗冷氣，最就腳嗰間舖頭都仲係佢，考慮咗一陣，唉，費事煩，近近哋啦，忍下囉，點知呢位師傅上到嚟，好似變咗另外一個人咁，笑容可掬，有問必答，仲好細心咁解釋所有細節，個感覺就好似......黃子揚同埋鄭子誠突然間笑住嚟慰問你，你係會有啲寒架，呢種情況發生喺佢身上，照機會率分析，50%係信咗主耶穌返緊教會，50%係兼職做緊傳銷，整完冷氣就會喺工具箱攞支潔面乳或者香薰sell我架喇，但一切都係我小人之心，原來喺呢十幾廿年之間，佢已經成為咗兩個小朋友嘅爸爸。
見佢唔同晒，我都放心同佢吹下水:「戒咗煙未呀?」
師傅:「戒鬼咗啦，屋企有兩條化骨龍，對小朋友唔好架，費事煙親佢哋啦。」
我:「老老實實，比起我細個嗰陣，你脾氣同埋態度好咗好多。」
師傅:「哈哈，老婆生咗兩件之後，我收晒火喇，我而家望住佢哋兩個就心滿意足。」
師傅一路講一路擒咗半個身出窗搞我部冷氣，冇任何安全措施，我嗰刻真係好驚，我好驚會發生意外，仲要係父親節前夕，我唔想上報紙A1頭條呀。我嘗試叫佢返入嚟:「小心啲呀，不如返入嚟先啦，呢度20幾樓，你徒手爬出去，我驚你跣腳呀。」
師傅:「唔怕，慣咗啦，做咗咁多年，搵食係咁架喇，唔辛苦點得世間財。」
冇錯，搵食不嬲都艱難，有時我覺得養自己都唔容易，更何況爸爸要擔起成頭家。
近幾日一直聽到身邊啲朋友話，父親節出去食飯又迫又貴，Book咗位都仲要排隊，我以前都係咁諗，不過人大咗先知道父親節、母親節仲可以出去同人迫，其實係一種福氣，我都好想坐低同我老竇食餐飯，可惜佢喺一個好遠嘅地方，所以愛要及時，記得抽時間陪下老人家，歲月不饒人，好多大節日嘅飯聚真係去一次少一次，珍惜。
#父親節 #好想同老竇食餐飯
Search